歐國盃C組矚目之戰,英格蘭登場,火併東歐勁旅塞爾維亞。「三獅兵團」被捧成奪標頂頭大熱門,分組賽首場出擊,將以3分為目標,佢哋大賽經驗豐富,喺分組賽贏波往往點到即止。塞爾維亞面對小組實力最強嘅英軍,亦會加強防守,2.5球入球細屬不二之選。(Now 618周一凌晨3時直播)
英格蘭上屆喺決賽飲恨得亞軍,卡塔爾世盃8強止步,今屆捲土重來,球隊上下將以冠軍為目標;「三獅兵團」近年人才輩出,特別是中前場,隨着祖迪比寧咸、菲爾科頓、布卡約沙卡等新星冒起,配合隊長王牌射手哈利卡尼,有足夠爭勝本錢,問題係球隊未在最佳狀態,上場熱身賽竟不敵冰島,近5場國際賽僅得1勝。同時,英格蘭喺大賽嘅分組賽習慣「收夠籌」就算,因此近7場歐國盃分組賽6次開2球或以下,估計今場就算贏都可能只係「煲魚生粥」僅勝。
後防不穩更加步步為營 況且,英軍後防不無隱憂,哈利馬古尼因傷落選,勞基梳爾亦有傷在身,修夫基今場或起用水晶宮中堅馬克古希,左閘改用捷比亞,防守起嚟更加要步步為營,否則一個唔小心先失波咁就頭痕。
史杜高域領軍嘅塞爾維亞擅長控傳,近期熱身賽錄得1勝1負,近況一般,最近一次對歐洲一線球隊係去年底熱身賽對比利時,結果輸0比1,今場面對英格蘭勢必受壓,將會縮後防線,再靠幾位射手如阿歷山大米祖域、杜辛華荷域等製造突擊機會,期望「偷雞」搶分,預計會係一場攻防戰,入波唔多。
|