歐國盃F組榜首大戰,首戰贏波嘅土耳其同葡萄牙對壘。奪標熱門葡萄牙上場雖然贏得驚險,但整體發揮其實相當理想,控制比賽同創造機會都完全冇問題,就連後備球員亦能夠產生巨大威脅,主帥馬天尼斯揸住C朗、般奴費南迪斯、貝拿度施華同迪亞高祖達「4條K」,實力同經驗都勝土耳其一籌,客勝要捧場。
(Now 618周日凌晨零時直播) 葡萄牙上仗要到補時先至以2比1絕殺捷克,不過佢哋全場坐擁7成控球率,以及18次攻門紀錄,老將C朗拿度威脅力依然強大,喺般奴費南迪斯、拉菲爾利亞奧同貝拿度施華嘅充足支援下,入球機會肯定源源不絕,以C朗嘅把握力,入波只係遲早嘅事。
後備兵都交足貨 葡萄牙一眾球星經過首戰適應,相信今仗可以有更好發揮,領隊馬天尼斯有成手好牌,迪亞高祖達、法蘭斯高干斯卡奧、柏度尼圖等攻擊球員,上場後備入替後都交到貨,葡萄牙嘅兵力可以確保全場向對手施重壓,靠後勁贏波絕對唔係幸運。
另邊廂,土耳其上場以3比1贏「新丁」格魯吉亞,19歲皇家馬德里超新星艾達古拿光芒四射,不過今仗面對葡萄牙難度倍增,而且土耳其攻擊線全屬25歲以下球員,大賽經驗欠奉,對住如日方中嘅葡萄牙難免輸蝕。翻查兩軍過去5次交鋒,葡萄牙贏出4次,今仗可望再贏一場提早出線。
|