今晚日職獨腳戲,橫濱水手主場硬撼鳥棲砂岩。水手今季戰績走晒樣,主因係太過重攻輕守,尤其係主場出擊,更加有前冇後、打死罷就,撞正狀態曳爆嘅砂岩,水手必定藉地利狂攻博反彈,中位數3.5球嘅入球大照撐。(無綫myTV SUPER周三晚6時直播)
上季聯賽亞軍嘅水手表現大跌Watt,主因係今季接手執教嘅前利物浦球星基維爾,戰術太過偏重進攻,導致入得又失得,最經典係亞冠盃決賽,首回合先贏艾阿恩2比1之下,次回合竟然狂輸1比5,兩回合計慘敗3比6失落冠軍,球隊上下打擊都幾大。睇番水手各項賽事近9場成績,法定時間贏得3場咁大把,近2場更連輸畀福岡黃蜂同東京綠茵,難怪依家只係徘徊聯賽中游。
鳥棲砂岩近4仗輸3場 另邊廂,鳥棲砂岩亦唔好得幾多,近4場聯賽僅得1勝3負,包括日前喺主場出戰柏雷素爾,喺領先1球之下,竟反輸四個一皮,現時排緊尾3,狀態差到冇朋友。水手今仗難得遇弱,梗係想趁主場之利博反彈,佢哋每逢主場例搶攻,近5次主場比賽,有4次開4球或以上,今場勢必以攻代守,入波一定多,大盤咪錯過。
|